Ким Ир Сенээс БНМАУ-ын Ерөнхий сайд Ю.Цэдэнбалд илгээсэн захидал

Өнөө цагийн даяаршлагдсан гэх нийгэмд дэлхийн тэргүүлэгч улс орнуудын ярианы сэдэв болсон хэд хэдэн орон байдаг. Иран, Ирак, Гүрж, Израйль-Палестин, Афгинастан, Латин Америкийн Венесуэл тэргүүтэй орнууд гэх мэт.
         Мэдээж энэ жагсаалт дээр дэлхийн өргөрөгийн 38 дугаар зэргэдээр хуваагдсан 2 Солонгосын нэг болох БНАСАУ нэмэгдэнэ. Энэ улс социалист үзэл санааг дэмждэг. Одоо ч тэр үзэл баримтлалдаа тууштай үлдсэн цөөн орны нэг. Энэ ч утгаараа Монгол Улстай дипломат харилцааны тал дээр сайн байсаар ирсэн.
         Монгол Улс ардчилалын замыг сонгохоос өмнө социалист лагерийн орнуудтай ихэд дотночлон харилцаж байлаа. Тиймээс ч БНАСАУ-тай хамтын ажиллагааг гүнзгий хөгжүүлж иржээ. Түүний нэгээхэн тод томруун жишээ бол Ким Ир Сенээс Ю.Цэдэнбалд илгээсэн захидал юм.
        

         Дор түүний явуулсан захидал, намтрыг нь хүргэж байна. Энэ захидлаар ямар нэгэн улс төрийн үзэл санааг эргэн сануулах гэсэнгүй. Харин түүхийн үнэн, тухайн үеийн бодит байдлыг мэдүүлэхийг зорилоо.

 

                                 Ким Ир Сений товч намтар:

Ким Ир Сен- 1946 он

    Гэр бүлийн байдал:
         1912 оны 4 сарын 15-нд төрсөн
         Эцэг-Ким Хен Жик
         Эх-Кан Бан Сок
         Анхны эхнэр Ким Чен Суктэйгээ 1940-1949 онд сууж байв. Түүний дараагаар Ким Сон Этэй гэрлэсэн.
         Хүүхдүүд-Ким Чен Ир, Ким Пен Ир

    Яс үндэс:
       Солонгос

   Харъяалах нам:
        Солонгосын Хөдөлмөрчдийн нам 

 Эрхлэж байсан албан тушаал:
        1948 оны 9 сарын 9-нөөс 1972 оны 12 сарын 28 хүртэл БНАСАУын Сайд нарын Зөвлөлийн даргаар,1972 оны 12 сарын 28-наас 1994 оны 7 сарын 8-ныг хүртэл БНАСАУ-ын Ерөнхийлөгчөөр тус тус ажиллажээ. Тэрээр 1994 оны 7 дугаар сарын 8-ны өдөр таалал төгсжээ. Түүний залгамжлагчаар том хүү Ким Чен Ир нь тодорсон юм. 

Ким Ир Сений бунхан өдгөө БНАСАУ-ын нийслэл Пхеньянд байрлаж байна.

 

 

БҮГД НАЙРАМДАХ МОНГОЛ АРД УЛСЫН ЕРӨНХИЙ САЙД Ю.ЦЭДЭНБАЛ ТАНАА
ХҮНДЭТ НӨХӨР ЦЭДЭНБАЛАА!

           Бүх дэлхийн энх тайвныг эрхэмлэгч улс түмний дэмжлэг, талархалтайгаар өөрийн эх орны нэр төр, эрх чөлөө, тусгаар тогтнолын төлөө тэмцэж байгаа Солонгосын ард түмэн зөвхөн фронт дээр төдийгүй бас ар талд амжилтуудыг олсоор байна.
           Хэдийгээр дэвшилтэд хүн төрлөхтний нийгмийн дайсан Америкийн махчинууд зэрлэг хорт хэргийг өдүүлэн хэрцгийлж байгаа боловч Солонгосын ард түмэн энэ жил их Зөвлөлт Холбоот Улсаар толгойлуулсан ардчилсан лагерийн найрамдалт орнуудынхаа ах, дүүгийн дэмжлэг тусламжтайгаар сүүлчийн жилүүдэд үзэгдээгүй өндөр их ургацыг хурааж, хүнсний фронт дээр их амжилтыг олсон юм.
          Ах, дүү Монголын ард түмэн маш олон тооны мал ба өргөн хэрэгцээний үнэт зүйлсийг Солонгосын ард түмэнд явуулж, үүгээрээ түүний дайчин хүчийг зузуутгах ба мөн хөдөө аж ахуйг хөгжүүлэн бэхжүүлэх хэрэгт их тусламжийг үзүүлсэн бөгөөд одоо ч үзүүлж байна.
          Дайсантай ширүүн тэмцлийг явуулахдаа Таны байнгын анхаарал ба ах, дүү Монголын ард түмэнд онцгой хайр, талархалтай байдгийн тэмдэг болгож энэ жилийн ургацын дээж үчүүхэн бэлэг явуулсан. Үүнийг Та хүлээж авна уу.
         Солонгос ба Монголын ард түмний найрамдлыг бэхжүүлэн, Бүгд Найрамдах Монгол Ард Улсыг цэцэглүүлэн хөгжүүлэх тусын тулд эрүүл энх, урт удаан наслахыг нөхөр Цэдэнбал Танд хүсье.

       БҮГД НАЙРАМДАХ АРДЧИЛСАН СОЛОНГОС АРД УЛСЫН САЙД НАРЫН ЗӨВЛӨЛИЙН
      ДАРГА КИМ ИР СЕН

      Пхеньян, 1952 оны 11 дүгээр сарын 3.